Tsy diso anjara tamin'ny fampitaovana "gilet" sy kiririoka ary jiro fanao am-paosy avy amin'ny Faritra Analamanga ireo andrimasom-pokonolona ao amin'ny Distrikan'i Manjakandriana. Fokontany 10 izay nosafidina manokana niaraka tamin'ireo tomponandraikitry ny filaminana any an-toerana no samy nisitraka "gilet" 15 sy kiririoka 15 ary jiro fanao am-paosy 2 avy.

 Tonga nanatitra izany tany an-toerana ny Talen'ny kabinetran'ny Faritra Analamanga, ANDRIANARIVELO Onja Heritiana, izay nisolo tena ny Lehiben'ny Faritra Analamanga mpisolo toerana, RAHARINIRINA Clémence. Nandray izany kosa ny lefitry ny Lehiben'ny distrikan'i Manjakandriana, RAFANOMEZANA Lantosoa Jean Nicolas.