Nanao fitsidihana ara-pomba fanajana teto anivon’ny Faritra Analamanga ny Team SCI-FAKA, avy ao amin’ny STEAM Club Ivato, sehatra iray mampivelatra ny fahaiza-manao amin’ny tontolon’ny "robotique".

Ny Team SCI-FAKA, izay anisan’ireo ekipa voafantina ao anatin’ny STEM FOR GOOD, dia ahitana tanora miisa 5 mianadahy, izay samy avy eto Analamanga avokoa. Isan'ireo hisolo tena an'i Madagasikara amin’ny Robotex International 2026, fifaninanana iraisampirenena momba ny robotique izay hotanterahina any Kôrea atsimo, ny 27 ka hatramin'ny 29 novambra 2026 izy ireo.

Nandritra ny fihaonana dia nampahafantarin’izy ireo an-dRamatoa Lehiben’ny Faritra Analamanga mpisolo toerana, RAHARINIRINA Clémence, ny dingana sy ezaka efa natao hahatongavana amin'izao sehatra iraisampirenena izao. Fotoana ihany koa nangatahan'izy ireo tsodrano sy tantsoroka avy amin-dRamatoa Lehiben'ny Faritra Analamanga.

Nitsodrano sy naneho ny fahavononana hanohana ireto tanora ireto ny Faritra Analamanga amin’ny fiatrehana ny Robotex International 2026 izay hotanterahina any Kôrea atsimo.