Notanterahina tetsy amin'ny CENACLE Amparibe Ambohidahy ny fivoriana isan-telovolana ho an'ny vondrom-paritra misahana ny fanjohiana sy fanombanana, fotoana iray nanaovana tombana ezaka ny asa vita teo anivon'ireo mpiantsehatra tsirairay.

Raha ny eto amin'ny Faritra Analamanga dia manodidina ny 44% ny tahan'ny tsy fanjarian-tsakafo mitarazoka. Araka ny fanazavan'ny Mpandrindram-paritra ORN Analamanga, Andriamatoa RANDRIANANDRASANA Alitiana, na hita ho betsaka aza ny sakafo hita eto amin'ny Faritra dia ambony ny tahan'ny tsy fanjarian-tsakafo mitarazoka noho ny tsy fahafehezana ny fisakafoana ara-pahasalamana, eo ihany koa ny tsy fahampian'ny fahefa-mividy sy ny kalitaon'ny sakafo (singa mahavelona).

Araka ny toromarika sy paikady avy amin'ny Fitondram-panjakana dia hapetraka eny anivon'ny kaominina ny ady amin'ny tsy fanjarian-tsakafo ary ady marolafy no hatao amin'izany. Ny tetikasa rehetra tanterahina dia hiteraka asa ho an'ny mpisitraka eny anivon'ny fiaraha-monina.

Hisy ny famolavolana ny drafitrasa kaominaly ho an'ny ady amin'ny tsy fanjarian-tsakafo na ny "Plan communal de nutrition" iarahan'ny Faritra sy ny Kaominina tsirairay.

Manatanteraka izany ny ONN na ny "Office National de Nutrition" izay manana ny ORN na "Office Régional de Nutrition" isam-paritra.

Nanokatra tamin'ny fomba ôfisialy ny fihaonana, nisolo tena ny Lehiben'ny Faritra Analamanga, ny Sekretera Jeneralin'ny Faritra, Andriamatoa RAMANANTSOA Ramarcel Schall; nanambara ny maha zava-dehibe ny fananganana ny "Plan communal pour la nutrition" izay manamafy ny fiaraha-mientan'ny mpiara-miombona antoka rehetra sy ny hananana rafitra mazava handrindrana ny asa mifandraika amin'izany. Nambarany ihany koa fa ny Faritra Analamanga dia manome lanja lehibe ny fiaraha-miasa amin'ireo mpiara-miombona antoka amin'ny fanatanterahana ny tetikasa mikasika ny fanjarian-tsakafo.