"𝑀𝑎𝑑𝑎𝑔𝑎𝑠𝑖𝑘𝑎𝑟𝑎 𝑙𝑎𝑣𝑖𝑡𝑟𝑦 𝑛𝑦 𝑡𝑠𝑖𝑛𝑑𝑟𝑦 𝑠𝑦 𝑛𝑦 𝑓𝑎𝑡𝑜𝑡𝑟𝑎". "𝑂𝑝𝑝𝑜𝑟𝑡𝑢𝑛𝑖𝑡𝑒́ 𝑒𝑡 𝑝𝑟𝑜𝑔𝑟𝑒̀𝑠 𝑝𝑜𝑢𝑟 𝑀𝑎𝑑𝑎𝑔𝑎𝑠𝑐𝑎𝑟. 𝐵𝑟𝑖𝑠𝑒𝑟 𝑙𝑒 𝐶𝑦𝑐𝑙𝑒 𝑑𝑒 𝑙𝑎 𝑐𝑎𝑝𝑡𝑢𝑟𝑒 𝑑𝑒 𝑙'𝐸𝑡𝑎𝑡".

Ireo no niompanan'ny valandresaka narahina adihevitra mikasika ny raharaham-pirenena eto Madagasikara izay notanterahin'ny Transparency International - Initiative Madagascar teny amin'ny Novotel Ankorondrano androany 27 oktobra 2026. Nivohitra tao anatin'izany ny endrika kolikoly fahita teto Madagasikara amin'ny fotoam-pifidianana, toy ny fizarazarana vola sy fitaovana na sakafo; fampiasana ny mpiasam-panjakana hanao fampielezan-kevitra; fandraisana fepetra ara-panjakana ho amin'ny tombontsoan'ny kandidà mpomba ny fitondrana; ny tsy fisian'ny mangarahara eo amin'ny fampiasam-bola ataon'ny mpifaninana amin'ny fifidianana. Ao anatin'izay fatotra ataon'ny mpitondra izay koa ny endrika fanararaotam-pahefana isan-karazany ataon'ny tomponandraikitra ara-panjakana ka itadiavany tombontsoa manokana sy anomezany tombon-dahiny ho an'ny mpandraharaha voafantina.

Nandroso hevitra ho an'ny governemanta sy ny antenimiera ihany koa ny Transparency International - Initiative Madagascar, toy ny fanamafisana ny fangaraharana sy ny famantarana ny loharanom-pamatsiam-bola amin'ny fampielezan-kevitra amin'ny fifidianana. Fametrahana rafitra mametra ny fampiasam-bola ataon'ny kandidà. Fampirisihana ny vehivavy havitrika amin'ny fandraisana anjara pôlitika. Fanamafisana ny rafitra mpanara-maso sy afaka mandray fepetra manoloana ny fitanilàna eo amin'ny fitantanan-draharaham-panjakana.

Olo-manankaja maro no tonga nanatrika ity valandresaka ity. Nisolo tena ny Lehiben'ny Faritra Analamanga tamin'izany ny Sekretera Jeneralin'ny Faritra, RAMANANTSOA Ramarcel Schall.