Ho fankasitrahana ny fanampiana nataony dia natolotr'ireo atleta solontenan'Analamanga ho an'ny Lehiben'ny Faritra Analamanga mpisolo toerana, RAHARINIRINA Clémence, ireo amboara azony tamin'ny fiadiana izay ho tompondakan'i Madagasikara ho an'ny olona manana fahasembanana. Amboaran'ny laharana faharoa teo amin'ny tsipy kanetibe olon-droa miaraka vehivavy sy ny taranja basket-ball. Fanampin'ireo dia nahazo medaly volamena efatra sy volafotsy iray ireo atleta avy eto Analamanga.

Eto amin'ny kianjan'ny Makis Andohatapenaka amin'izao fotoana izao ny Lehiben'ny Faritra Analamanga, RAHARINIRINA Clémence, sy ireo mpiara-miasa aminy, manotrona ireo klioba hiatrika ny "SECTION MAROVATANA RUGBY" na ny fiadiana ny Tompondakan'ny distrikan'Ambohidratrimo, taranja baolina lavalava.

Tonga nanolotra "takela-pitaratra fahatsiarovana" ho an'ny Lehiben'ny Faritra Analamanga mpisolo toerana, RAHARINIRINA Clémence, ny Klioba Fandrefiala sokajy zazavavy latsaky ny 16 taona. Ho valim-pitia tamin'ny tantsoroka azon'izy ireo nentiny tany amin'ny fiadiana izay ho tompondakan'i Madagasikara, nizotra tany Ambositra ny 22 ka hatramin'ny 30 aogositra lasa teo.

Ho fanamaivanana ny vesatr'ireo ray aman-dreny amin'ny fampidirana mpianatra dia nitohy ny fanomezana fanampiana fitaovam-pianarana ataon'ny Faritra Analamanga, toy ny efa natao tany amin'ireo distrika maro manerana ny Faritra.

Nankalazaina tao amin'ny lapan'ny fanatanjahantena sy ny kolontsaina Mahamasina omaly alarobia 16 septambra, ny hetsika fankalazana ny Androm-pirenena ho an’ny Fahiziana. Hetsika izay teo ambany fitarihan'ny Minisiteran’ny Atitany sy ny Fitsinjaram-pahefana, niaraka tamin’ireo mpiara-miombona antoka, toy ny Organisation Internationale de la Francophonie (OIF) sy ireo sampan-draharaha rehetra voakasika. Nialoha izany ny diabe an-tongotra nihodidina ny farihin'Anosy nataon'ny tanora sy ny mpianatra.

Nifarana ny sabotsy 05 septambra lasa teo ny fifaninanana ASIEF 2026,izay notontosaina tany Manakara. Anisan’ireo nandray anjara tamin’izany ny Faritra Analamanga, ka nifaninana tamin’ny taranja Basket-ball, Lomano ary Dihy.